Металлург күні қарсаңында Балқаш мыс балқыту зауытының кіре берісінде үздік металлургтер марапатталып, есімдері Еңбек Даңқы галереясына енгізілді. Олар: алты ұстаз, сегіз жас маман және он алты өндіріс озаты. Олардың барлығына БМЗ директоры Ербол Айбековтың атынан төске тағатын көгілдір ленталар мен гүл шоқтары табыс етілді. 

Металлургтерді қала әкімінің орынбасары Саят Әбеу құттықтап, қала әкімінің атынан жұмысшыларға Құрмет грамоталарын табыстады. Марапатқа ие болғандар: шихта дайындау цехының есепке алу жөніндегі инженері Динара Бадағұлова, күкірт қышқылы цехының слесарь-жөндеушісі Алмас Қырбасов, ДМЦ су ерітінділері электролизшісі Владимир Ивашкевич және жетекші экономист Динара Абдулина. 

Жұмысшыларды кәсіби мерекелерімен «Қазақмыс Смэлтинг» ЖШС бас директоры Әділет Барменқұлов құттықтап, өндірістік қызметтегі жоғары жетістіктері үшін, металлургиялық өндіріс кәсіпорындарының әлеуметтік-экономикалық дамуына қосқан үлестері үшін «Қазақмыс Холдинг» ЖШС Директорлар кеңесі төрағасының және Бас операциялық директордың атынан үздік жұмысшылар тобын Құрмет грамоталарымен марапаттады. Сондай-ақ, жиналғандарды Смэлтингтің өндіріс жөніндегі директоры  және техникалық директоры Марат Әубәкіров пен Гулам Камирдинов, БМЗ директоры Ербол Айбеков, кәсіподақ жетекшілері, «Нұр Отан» партиясы мен Жастар одағының өкілдері құттықтады.

«Менің зауытым-менің өмірім» бейнероликтер байқауының жеңімпаздары да сый-сияпаттан құр алақан қалған жоқ. Олар:

1 орын  - Азат Рақышев, шихта дайындау цехының слесарь-жөндеушісі.

2 орын  - Бақытжан Қадырқұл, бағалы металл цехының шебері.

3 орын  - Болатбек Қашқынбай, ЖМЗ қаптау жұмыстары цехының жұмысшысы.

Қазылар алқасының арнайы сыйлығымен БМЗ МБЦ электрмонтері Әділжан Бейсембаев марапатталды.

Еңбек даңқы галереясында БМЗ цехтары арасында өткен өндіріс мәдениеті сайысы қорытындыланды. Мыс электролизі цехы ең үздік цех деп танылды (цех бастығы Дархан Жұмабаев). Екінші орынды шихта дайындау цехы жеңіп алды (цех бастығы Жанат Иманбеков). Мыс балқыту цехының ұжымы үшінші орынды иеленді.

Басты мереке Оқушылар сарайы мен Жағалауда өтті.

Металлургтерді қала әкімі Ораз Тәуірбеков, «Қазақмыс Смэлтинг» ЖШС бас директоры Әділет Барменқұлов және «КәсіпҚорған» ҚБ кәсіподақ комитетінің төрағасы Тоғызбай Тәжбенов құттықтады.

Салтанатты жиында «Қазақмыс Смэлтинг» ЖШС құрылымдық бөлімшелерінің 10 жұмысшысы «Еңбек даңқы» салалық төсбелгілерімен марапатталды. Төрт адамға облыс әкімінің Алғыс хаттары мен қала әкімінің Құрмет грамоталары табысталды. Директорлар кеңесі төрағасының және Бас операциялық директордың Құрмет грамоталары 16 адамға берілді, үш жұмысшыға «КәсіпҚорған» ҚБ Құрмет грамоталары табыс етілді.

Сонымен бірге, ҚР Президенті Қасым-Жомарт Тоқаевтың Алғыс хатымен «Қазақмыс Смэлтинг» ЖШС бас директоры Әділет Барменқұлов марапатталды.

Отты мамандық өкілдері – металлургтерді  ұлықтау Жағалауда жалғасты. Флэшмоб ұйымдастырылып, қала тұрғындары мен қонақтары қазақстан эстрада жұлдыздарының және әлемдік деңгейдегі жұлдыз – Димаш Құдайбергеннің концертін тамашалады. Мереке отшашумен аяқталды.

Ләззат Смағұлова.