Жиналысқа ғылыми-зерттеу, білім беру институттары - “R&IID” халықаралық инновациялық-өндірістік консорциум мүшелері, яғни; Ұлттық зерттеу технологиялық университеті «МИСиС» ( Мәскеу), Урал  федералды  университеті, Урал тау-кен-металлургиялық компаниясы жанындағы Техникалық  Университет (Екатеринбург), Қазақстан Республикасының Ұлттық  инженерлік  академиясы, Қазақстан Ұлттық жаратылыстану ғылымдарының  академиясы, ҚР Ғылым комитетінің «Жану проблемалары институты» ҒЗИ  және Түсті металлургия кәсіпорындарын жобалау жөніндегі Қазақстан бас институтының өкілдері келді. Кеңеске «Қазақмыс корпорациясы» ЖШС Басқарушы Кеңесінің Бас директоры Бақтияр Қырықпышев бастаған жетекшілер мен мамандар да қатысты.

Қатысушылар «Қазақстанның күрделі тау-кен-геологиялық жағдайында кен шоғырын модельдеуге арналған  үш өлшемді сейсмобарлау» бірлескен жобасының орындалу барысын талқылады. Жоба авторларының ойынша, бұл зерттеулер ТМК(Тау-кен металлургиялық кешен) кәсіпорындарында инновациялық технологияларды енгізуге, геологиялық барлау жұмыстарының тиімділігін арттыруға және минералды-шикізат қорын нығайту бойынша экономиканың тау-кен өнеркәсіп секторының проблемаларын шешуге мүмкіндік береді.

Сонымен бірге, жиналысқа қатысушылар «Қазақмыс» кәсіпорындарында техникалық, технологиялық аудит жүргізу мүмкіндігін қарастырды. Оның қорытындысы бойынша Холдингтің 2030 жылға дейінгі инновациялық даму Стратегиясы әзірленбек. Бұдан бөлек, Урал тау-кен-металлургиялық компаниясы жанындағы  Техникалық университеттің қызметімен және ғылыми жобаларымен танысты.

Кеңейтілген кеңесте  Қазақстан Республикасы Білім және Ғылым министрлігінің гранттық қаржысы негізінде  «R&IID» халықаралық инновациялық-өндірістік консорциумның қатысушылары-институттармен ғылыми-зерттеу жұмыстарын жүргізу туралы ұсыныстар айтылды. 

Жалпы алғанда, халықаралық мамандармен осы тектес диалог орнату өндірістің тиімділігін, шикізатты қолданудың кешенділігін және  бәсекеге қабілеттілікті арттырады деп санайды, қатысушылар.

Айта кетейік, бұл - Қазақстан мен Ресей ғылыми қауымдастығының өзара іс-қимылына арналған екінші жиналыс. Алғашқысы былтыр  қараша айында өтті.  Сол кезде «Қазақмыс корпорациясы» ЖШС, ҚР «Ғылым қоры» және «Казгипроцветмет» ЖШС арасында «Қазақстанның күрделі тау-кен-геологиялық жағдайында кен шоғырын модельдеуге арналған  үш өлшемді сейсмобарлау» жобасы бойынша ғылыми және ғылыми-техникалық қызметтің нәтижелерін коммерциализациялауға «Ғылым қоры» тарапынан  242 миллион теңге көлемінде грант беру туралы үшжақты келісімге қол қойылған болатын. «Қазақмыс» бұл жобаға  жеке серіктес ретінде қатысуда.  Жоба аясындағы зерттеулер 3D-сейсмобарлау жүргізу арқылы геологиялық құрылымы жағынан күрделі кен орындарын модельдеу технологияларын енгізу және  коммерциализациялау мақсатында жасалынады.