Golden Voices of Montserrat  халықаралық байқауы-  кәсіби және әуесқой хорларға арналған ірі фестивальдардың бірі. Оған қатысу үшін жыл сайын әлемнің әр түкпірінен үздік вокалдық топтар ағылып келеді. Биыл фестивальға 22 елден: Түркия, Ресей, Жапония, Болгария, Латвия және т.б мемлекеттерден өнерпаздар қатысты. 

Халықаралық байқауға Қазақстан атынан Қ.Аманжолов атындағы музыкалық мектептің 33 тәрбиеленушісі   қатысты.  Барлығы екі топ: кішісі «Көктем», үлкен топ «Рахмет»  деп аталады. Қатысушылар 7 мен 15 жас аралығындағы жеткіншектер.

Жас таланттар фестивальға ұзақ әрі тыңғылықты дайындалды. Жарты жыл бұрын казақ, орыс және латын тілдеріндегі шығармаларды орындауды бастады. Байқауға арнап  қазақтың ұлттық киімдері арнайы  тапсырыспен тігілді.

   Үміт ақталды. Қарағандылық хор құрметті үшінші орынды жеңіп алып, жүлдегерлер қатарынан көрінді. Сондай-ақ, екі орындаушы – Ұлпан Әбдікерова мен Ақбота Өмірхан ІІ дәрежелі дипломдармен марапатталды.  

Жас дарындардың сапарына «Қазақмыс корпорациясы» демеушілік жасады.