Жезқазғандағы бас даңғыл ақшаңқан  киіз үйлердің шағын қалашығына айналды. «Қазақмыс» корпорациясының кәсіпорындары, мемлекеттік мекемелер мен қоғамдық ұйымдар атынан барлығы 24 киіз үй тігілді. Ал, мерекелік концерт Алаш алаңында өтті.   

Дәстүр бойынша  Наурыз көже, бауырсақ пісіріліп, әрбір киіз үй мерекелік дастархан жайды. № 1, 2, 3, байыту фабрикасының және Жезқазған мыс балқыту зауытының  мол дастарханынан мерекеге жиналған жұртшылық дәм татты.  

«Jastar Bolаshaq» жастар одағы армреслинг және дартстан сайыс ұйымдастырды.  Ал, бас даңғылда  асық атудан, тоғызқұмалақтан, қазақша күрестен спорттық жарыстар өтті. Жеңімпаздардың барлығы да бағалы сыйлықтармен марапатталды.

Ұлыстың Ұлы күнімен жиналған қауымды Жезқазған қаласының әкімі Қайрат Бегімов және «Қазақмыс корпорациясы» ЖШС Тау-кен өндірістік кешенінің бас директоры Сайран Әменов құттықтады. 

Наурыз мерекесі Сәтбаев қаласында да кең көлемде  аталып өтілді.  Кеншілер алаңында халықтық серуен, мерекелік жәрмеңке ұйымдастырылып, ондаған киіз үй тігілді. Олардың арасында Қазақмыс компаниясының кәсіпорындары атынан тігілген  киіз үйлер  де бар.

Түрлі спорттық сайыстар мен ойындар жалпықалалық деңгейде барлық мерекелік алаңдарда өтті. «Қазақмыс» компаниясының кәсіпорындары  арасында  дәстүрлі «үздік киіз үй» байқауы ұйымдастырылды.  Оның қорытындысы бойынша Бас жүлдені Жомарт кенішінің киіз үйі жеңіп алса, бірінші орын №1, 2, 3 ЖБФ-на, екінші орын ЖМБЗ, ал үшінші орын Оңтүстік-Жезқазған кенішіне бұйырды. 

Жүлдегерлер мен жеңімпаздарға дипломдар мен бағалы сыйлықтарды «Қазақмыс корпорациясы» ЖШС Басқарушы Кеңесінің Бас директоры Бақтияр Қырықпышев табыстады.

Ол сондай-ақ, қаланың барлық  тұрғындарын Ұлыстың Ұлы күні – Наурыз мерекесімен құттықтап, зор денсаулық, мол табыс, әрбір отбасыға құт-береке тіледі.