Golden Voices of Montserrat (Монтсерраттың алтын дауыстары) халықаралық байқауы –кәсіби және әуесқойларға арналған ең ірі хор фестивальдерінің бірі. Жыл сайын оған қатысу үшін әлемнің әр түкпірінен үздік вокал ұжымдары жиналып, Испанияның  Коста Брава жағалауын әнге бөлейді. Байқауға іріктеу талабы да қатаң. Сондықтан тек мықтылар ғана испан сахнасына шығуға мүмкіндік алады. Осындай құрметке «Балаларға бейбітшілік» атты республикалық хор байқауын жеңіп алған Қ.Аманжолов атындағы Қарағанды балалар музыкалық мектебінің тәрбиеленушілері ие болды.

Музыкалық мектептің  33 оқушысының байқауға  барып-қайтуына  «Қазақмыс» компаниясы демеушілік жасады.

Golden Voices of Montserrat халықаралық байқауы  24- 28 наурыз аралығында  Льорет-де-Мар қаласында өтеді. 20 елден өкілдер қатысатын фестивальға қарағандылық хордың екі құрамы  – кіші «Көктем» (7 - 11 жас аралығындағы балалар ) және үлкен «Рахмет» ( 11- 15 жас) тобы қатысады. Әртістер өздерімен бірге 4 музыкалық шығарма алып барады. Олардың арасында қазақтың халық әні  «Наурыз» бар. Шығармашылық ұжым халықаралық сахнада Қазақ елінің атынан абыроймен өнер көрсетуді өздеріне басты мақсат тұтып отыр.